Хәлләр мактанырлык түгел

Республикада халык саны артуга барамы яки кимүгәме? Бу уңайдан Башкортстанстат китергән рәсми саннарга күз салыйк. Шул мәгълүматларга карасаң, быел 12,3 мең кешегә кимегәнбез.

2019 елның 1 гыйнварына республикада исәп буенча 4 млн 51 мең кеше булган. Ел агышында туучылар саны да, үлүчеләр саны да артмаган, киресенчә, кимрәк. Әйтик, 2019 елның гыйнвар – август аенда 28 343 бала туган. Бу узган елга караганда 3406 кешегә кимрәк. Былтыр бу вакыт аралыгында 31 749 сабый туган булган.

Бакыйлыкка күчүчеләр саны – 33 042, 2018 елда 34 456 булган (1414 кешегә кимрәк). Аларның 189ы бер яшькә җитмәгән балалар. 2018 елда 178 сабый вафат булган.

Вафат булучылар арасында йөрәк-кан тамыры белән авыручылар саны 45,4% — 15 008, яман шештән 14,5% — 4786; юл һәлкатендә - 307 (-31); алкогольдән агуланып 70 (-5) кеше җан тәслим кылган. Үзләренә кул салучылар 552 кеше (-36), үтереш корбаннары -111 (+5). Тын юлы һәм инфекцияле авырулардан 2065 (+367) кеше вафат булган.

Русиянең башка төбәкләренә – 999; БДБ илләренә 404 кеше киткән. Ерак чит илләрдән 21 кеше килгән.

Башкортстанлылар арасында өйләнешү һәм аерылышу очраклары да кимегән: 16 356 никах теркәлгән (узган елдагыдан 1246 азрак), аерылышучылар саны узган елдагыдан 81 очракка кимрәк, ягъни 10 102 тәшкил итә.

Табигый арту буенча, Уфа Русиядә - дүртенче, үлүчеләр буенча – өченче, туучылар саны буенча бишенче урында тора.

https://omet-rb.rbsmi.ru/articles/-mgyyat/kh-ll-r-maktanyrlyk-t-gel-/