Хәрби диңгез флотын үстерәчәкбез

Президент Хәрби Диңгез флоты өчен дәүләт оборона заказы мәсьәләләре буенча Оборона министрлыгы һәм ОПК предприятиеләре җитәкчелеге белән киңәшмә уздырды.

Иң тәүдә ул шуңа игътибар юнәлтте: нәкъ шушы көннәрдә, 3-4 декабрьдә, Лондонда НАТО саммиты узды. Саммит альянсның 70 еллыгына багышланды. Ә альянс 1949 елның дүртенче апрелендә "салкын сугыш" һәм Советлар Союзына каршы көрәшнең төп өлеше буларак оештырылган.

В. Путин билгеләвенчә, Русия берничә тапкыр НАТО белән хезмәттәшлеккә әзер иде, уртак янауларга (халыкара террорчылык, локаль кораллы конфликтлар, массакүләм зарарлану коралының контрольсез таралу куркынычы) каршы тору өчен әзер булды. Берничә тапкыр альянска каршы адымнар ясады, конструктив көн тәртибен тәкъдим итәргә тырышты. Берничә уртак чара үткәрелде, ләкин 2008 елдан соң хезмәттәшлек асылда өзелде, чөнки альянс Русия Федерациясе мәнфәгатьләрен исәпкә алмыйча, Русия тәкъдим иткән партнерлык хезмәттәшлеген күздә тотып, корректлы эш итмәде. Ләкин Президент, шуңа карамастан, планетаның гомуми иминлеге, тотрыклы һәм тыныч киләчәге мәнфәгатьләре өстенлек алуына ышана.

“Бүген Русия НАТОны киңәйтүдән, аның Русия чикләре янында хәрби инфраструктурасын үстерүдән чыгып эш итәргә тиеш – бу безнең ил иминлегенә потенциаль янауларның берсе”, – диде ул. – Шуңа күрә, киңәшмәбезнең көн тәртибенә кайтып, билгеләп үтәм: Кораллы Көчләрне техник яктан яңадан җиһазлауга без зур игътибар бирдек. Шул исәптән, әлбәттә, Русия Хәрби Диңгез флотын модернизацияләүгә дә. Дәүләт оборона заказы кысаларында агымдагы елда Хәрби Диңгез флоты (ХДФ) кораллануның һәм техниканың 480 төп үрнәген алачак. Алар арасында – ике су асты көймәсе, 23 су өсте корабы һәм тәэмин итү судносы, өч һава судносы, дүрт яр буе ракета комплексы һәм 400 берәмлектән артык төрле ракета һәм торпеда коралы.

Диңгез стратегик атом-төш көчләре "Булава" баллистик ракеталары, "Борей" тибындагы заманча атом су асты крейсерлары белән яңадан җиһазландырыла. Дәүләт сынауларының йомгаклау стадиясендә "Борей-А" – "Князь Владимир" төп атом крейсеры тора. Тагын шундый дүрт су асты көймәсе төзелә.

ХДФның стратегик атом-төш булмаган көчләре төркеменә килгәндә, аның нигезен кораблар – зур ераклыктагы "Калибр" югары төгәллекле корал йөртүчеләр тәшкил итә. Бу ракеталар, билгеле булганча, 1500 километр ераклыктагы максатларга һөҗүм итә ала.

Флотны ерак диңгез зонасы кораблары белән җиһазлау темплары үсә. Сәнәгать предприятиеләрендә әлеге класслы тугыз су өсте корабле төзелә. Тулаем алганда, ХДФның заманча кораллануы өлеше 68 процент тәшкил итә. Яңадан кабатлыйм: без Хәрби Диңгез флотын алга таба да үстерәчәкбез, аны заманча, океанча һәм югары нәтиҗәле итеп эшләячәкбез”.

https://tulpar.rbsmi.ru/news/H-rbi-di-gez-flotin-ster-ch-kbez-26782/

#ВладимирПутин