Владимир Путин: "Нәрсә булса да, әзер торырга кирәк..."

Русия Президенты Владимир Путин Севастополь башлыгы Михаил Развожаев белән очрашу барышында коронавирус инфекциясе таралу фонында барлык мөмкин булган вакыйгалар үсешенә әзер булырга кирәклеген әйтте.

Развожаев дәүләт башлыгына инфекциянең таралуын булдырмау буенча төбәктә күрелә торган чаралар турында сөйләде, әле 77 кешенең – йортта, 8 кешенең йогышлы авырулар дәваханәсендә контрольдә торуын күрсәтте.

- Нәрсә булса да, әзер булырга кирәк, шуңа күрә сез барысын да дөрес эшлисез. Төбәктә булган хәлләрне шәхсән контрольдә тотыгыз, - диде аңа Владимир Путин.

Бөтендөнья сәламәтлек саклау оешмасы 11 мартта дөньяда коронавирус пандемиясен игълан итте. Соңгы мәгълүматларга караганда, Русиядә зарарлану очракларының 147 очрагы расланган. Соңгы мәгълүматлар буенча, әлегә Башкортстанда коронавирус йоктыруның бер очрагы да теркәлмәгән.

Фото: "РИА Новости" сайтыннан

Автор: Ример Насретдинов

https://kiziltan.rbsmi.ru/articles/politika/Vladimir-Putin--N-rs-bulsa-da--zer-torirga-kir-k-174462/

Читайте нас: