Су - яшәү чыганагы!

Русия Президенты Владимир Путинның 2018 елның 7 маенда имзаланган 204 санлы Указына ярашлы башкарылган 12 гомумдәүләт проекты арасында “Экология” аерым урын тота. Аны тормышка ашыруга республикада 2024 елга кадәр 45,1 миллиард сум акча бүленә. Әлеге проектның беренче нәтиҗәләре күренә башлады да инде. Мәсәлән, “Экология” гомумдәүләт проекты кысаларында тормышка ашырылган “Чиста су” федераль проекты эчендә республика Хөкүмәтенең 30 августта кабул ителгән карары белән “Башкортстан Республикасында эчәр су сыйфатын яхшырту” төбәк программасы расланды.

Программаның төп максаты – 2024 елга кадәр республика халкының 92,5 процентын үзәкләштерелгән су илтү системаларыннан алынган сыйфатлы су белән тәэмин итү. Әлегә бу күрсәткеч – 87,6 процент.

Алты ел эчендә Әлшәй, Баймак, Бишбүләк, Бөре, Благовар, Благовещен, Дәүләкән, Иглин, Калтасы, Кыйгы, Кушнаренко, Мәчетле, Стәрлетамак, Уфа, Федоровка, Хәйбулла, Чакмагыш, Чишмә районнарында һәм Стәрлетамак шәһәрендә нормативларга туры килмәгән 29 су белән тәэмин итү объектын реконструкцияләү яки яңадан төзү планлаштырыла.

Нәтиҗәдә, республиканың 45 авыл һәм касабасында яшәүче 200 мең кеше сыйфатлы су эчә алачак. Шушы максатка федераль бюджеттан 4 миллиард сумнан артык акча күчәчәк, ә республика казнасы барлык чыгымнарның 2 процентын каплаячак.

Быел проект кысаларында Дәүләкән шәһәрендә ике табигый су чистарту корылмасын төзү планлаштырыла. Шулай ук Уфа районының Комлыкул, Якшыван, Горново, Кызыл Яр, Карюгино, Тәҗрибә хуҗалыгы авыллары халкы чиста су белән тәэмин ителәчәк.

Якын арада Әлшәй районының Раевка, Чакмагыш районының Чакмагыш, Чишмә эшчеләр поселогы, Келәш, Иглин авыллары кешеләре кулланган су сыйфаты күпкә яхшырачак.

https://tulpar.rbsmi.ru/articles/natsproekty-gomumd-l-t-proektlary/su-yash-chyganagy/

#национальныепроекты;

#нацпроекты;

#региональныепроекты;

#регпроекты;

#нацпроектыБашкортостан;

#ВладимирПутин

Читайте нас: